அன்னை உபாசனை

3. ஶ்ரீமத்ஸிம்ʼஹாஸனேஶ்வரீ 

லலிதை சிம்மத்தின் மேல் சவாரி செய்கிறாள். அவள் பூரண மங்களகரமுடைய ஸ்ரீத்துவம் உடையவள். 

சாதனா மந்திரம்: 

ௐ ஐம் ஹ்ரீம் ஸ்ரீம் ஶ்ரீமத்ஸிம்ʼஹாஸனேஶ்வர்யை நம꞉ .

{இதனை இறை சாதனையாக்க விரும்புவர்கள் இந்த மந்திரத்தை ஜெபித்து கீழ்வரும் தத்துவத்தை தியானித்து வருக}

ஸிம்ஹா என்றால் சிங்கத்தைக் குறிக்கும். அது ஆசனமாக பயன்படும் போது அது தாங்குகிறது. இது லலிதையைத் தாங்கும் ஆசனத்தைக் குறிக்கிறது. லலிதையின் ஆற்றலைத் தாங்கி வரும் மந்திரத்தையும் இது குறிக்கும். இந்தச் சொல்லில் எழுத்துக்களை மாற்றினால் லலிதையின் பலவிதமான உபாசனை இரகசியங்களைத் தரக்கூடியது. 

தமோ குண நிலையில இருக்கும் ஒருவன் லலிதா சாதனை மூலம் ஸிம்ஹ நிலையில் எனப்படும் ரஜோ குணத்தை முதலில் தோற்றுவிக்கும். 

ஸிம்ஹமாகிய சிங்கம் ரஜோ குணம் நிறைந்தது. வலிமையான ஆற்றலுடன் கூடிய செயலைக் குறிக்கும். வலிமையும் ஆற்றலும் முதல் நிலையில் ஹிம்சையாகவே வெளிப்படும். பின்னர் அது ஹம்ஸி எனப்படும் பெண் அன்னத்தைக் குறிக்கும் சொல்லாக மாறும் நிலையை அடையும். ஹம்ஸம் சித்தசாகரத்தில் அசையாமல் நிற்கும் சம நிலையுடன் கூடிய சமாதி நிலையைக் குறிக்கும் குறியீடு. ஹம்ஸம் பகுத்தறியும் புத்தியைக் குறிக்கும். எப்படி அன்னம் நீரிலிருந்து பாலைப் பிரிக்கும் ஆற்றல் இருக்கிறதோ அப்படி லலிதையை உபாசிக்கும் சாதகன் அநித்தியத்திலிருந்து நித்தியமான உண்மையை அறியும் ஆற்றல் பெறுவான். லலிதையின் மந்திர சாதனை ஹம்ஸி நிலையை அடையும் போது மந்திரம் ஸரஸ்வதி நிலையை அடையும். இப்போது உபாசனை ஸத்துவ நிலையை அடையும். ஸத்வ நிலை உபாசனை செயல்களில் அதிகம் நாட்டம் இல்லாமல் தான் அடைந்த நிலையை ஆழமான அமைதியில் அனுபவிக்கும் நிலையைத் தரும். இது சரஸ்வதியின் தன்மை; 

சரஸ்வதி படைப்புத் திறனின் உச்சமாக இருப்பதால் எல்லவித புத்தாக்க உணர்வு (creativity), ஸ்தூல, சூக்ஷ்ம, காரண நிலைகளில் அனுபவிக்கும் அனைத்தும் உச்சகட்ட இன்பத்தை அனுபவிக்கச் செய்யும். ஹம்ஸ என்றால் “அஹம் ஸ” என்று பொருள்; இதன் அர்த்தம் நான் காண்பதெல்லாம் என்னில் இருந்து வெளிப்படுபவை என்ற பூரண அறிவு. 

ஒருவன் ஸ்ரீ லலிதையின் உபாசனையை தாமஸ குணத்துடன் தேவிக்கு விலங்குகளை பலியிட்டு தொடங்கினாலும் அந்த பலியிடும் தாமஸ குணம் தேவியின் ஆசனமாக இருப்பதால் அவள் படிப்படியாக சாதகனின் அகத்திலிருக்கும் விலங்குகளான பேராசை, கோபம், மாயை, பெருமை, பொறாமை, பயம் போன்றவற்றை பலியிடச் செய்து பரிணாமத்தில் உயர்த்துகிறாள். மேலும் ரஜோ குணத்தை உண்டுபண்ணி உலகத்திற்கு நன்மை செய்யும் பதவி, ஆற்றல், எல்லோரையும் கட்டுப்படுத்த வேண்டும், ஆண்கள், பெண்களை வசீகரீக்க வேண்டும் என்ற ரஜோகுண உத்வேகங்களை உண்டு பண்ணுகிறாள்; 

இறுதியாக ஸாத்வீக குணப் பண்புகளான அன்பினை பரவச் செய்தல், கருணை, அறிவு, எது சரி எது பிழை எனும் பகுத்தறிவு, புலன் இன்பங்களை இறைசாதனையாக்கும் தன்மை, மற்றவர்களது முன்னேற்றத்திற்கு தன்னை அர்ப்பணித்தல் ஆகிய பண்புகளை சாதகனில் உருவாக்குகிறாள். இந்த உயர்ந்த ஸாத்வீகத் தன்மையே ஸ்ரீ சக்கரம் என்று சொல்லப்படுகிறது. 

இந்த நிலை மூன்று உயர்ந்த உபாசனைகளின் சமத்துவத்தை சாதகனில் உண்டுபண்ணுகிறது. 

1. அக எதிரிகளை இல்லாதொழித்தல்

2. ஆற்றலினைப் பெறுதல்

3. பிரபஞ்ச அன்பினை உணர்தல் 

இவற்றைப் பெற்ற பிறகு இந்தத் தன்மைகளிலிருந்தும் மீண்டு அதை விட உயர்ந்த நிலை உபாசனையாகிய தானே அதுவென்று உணர்ந்து சும்மா இருத்தல் நிலையையும் ஸ்ரீ லலிதா உபாசனை தரும். இதுவே நிரந்த பேரின்பம் தரும் ஞானமாகும். 

சிம்மத்தை ஆசனமாக் கொண்டவளே அதை அடக்கவும் முடியும்; பிரக்ருதியினை அசைத்து செயல் படுத்தும் முக்குணங்களின் முதல் குணமான தாமஸ குணத்தை தனது ஆசனமாகக் கொண்டு ஒரு சாதனகனை ரஜோ, சத்துவ குணத்திற்கு உயர்த்தி பின்னர் குணங்களைத் தாண்டி தானே அது என்று உணரவைக்கும் உயர் ஸமாதி அனுபவத்தைத் தரக்கூடியது ஸ்ரீ லலிதா உபாசனை.

வழிகாட்டல்:

இந்தப் பதிவை வாசிக்கும் போது அன்னையை உபாசிக்க வேண்டும் என்று எண்ணம் தோன்றினால் எந்த மனத் தடங்கலும் இன்றி இங்கு தரப்பட்டுள்ள ௐ ஐம் ஹ்ரீம் ஸ்ரீம் ஶ்ரீமத்ஸிம்ʼஹாஸனேஶ்வர்யை நம꞉ .

மந்திரத்தை தினசரி 108 ஜெபித்து வாருங்கள்! தகுந்த நேரம் வரும் போது அன்னை தனது குருபரம்பரையில் ஒருவரை குருவாக அனுப்பி முறையான உபாசனையைக் கற்பிப்பாள்! அதன் பின்னர் உங்கள் குரு முறைப்படி தீக்ஷை அருளி எதைச் செய்ய வேண்டும், செய்யக்கூடாது என்ற நிபந்தனைகளைச் சொல்லித்தருவார்!

{எனது குருநாதர் தேவிபுரம் ஸ்ரீ அம்ருதானந்த நாதர் ஸ்ரீ லலிதா ஸஹஸ்ர நாமத்திற்கு எழுதிய "ஸுதா ஸ்யந்திநீ பாஷ்யம்" எனும் விளக்கவுரையின் தமிழாக்கம்; தேவி உபாசனை கற்க விரும்புவர்கள் தொடர்பு கொள்ளலாம்.}