செங்கோண்மை

செங்கோல் என்பது தமிழர்கள் எப்படி அதிகாரத்தைக் கையாண்டார்கள் என்பதன் குறியீடாகும். பிரித்தானிய அரசர், மேற்கத்தியே அரச வமிசங்கள் கையில் தாங்கும் Sceptre என்பதன் பொருள் அதிகாரக் கோல் என்பதாகும். ஆனால் தமிழர்கள் இதை இரண்டாகப் பகுத்து அறம் வகுத்திருக்கிறார்கள். 

அதிகாரத்தை ஒருவன் எப்படியும் அடையலாம்; அடைந்த பிறகு அந்த அதிகாரத்தை அடைந்தவன் அப்பியாசிக்கும் முறையில் அது செங்கோன்மையாகவும், கொடுங்கோன்மையாகவும் இருக்க முடியும். 

ஆகவே அதிகாரத்தை அடைந்தவனது அறிவு முதிர்ச்சி, மனப்பண்பு, அறம் என்பவற்றை அவன் சமமான மன நிலையில் அப்பியாசிக்க வேண்டும் என்பது அவனிற்கு அறத்தைப் போதித்த ராஜ குரு நினைவுபடுத்த வழங்கப்படுவது. 

இது தங்கத்தால் ஆக்கப்பட்டிருப்பது அதிகாரத்தைக் கையாள்பவன் தங்கத்தைப் போல் மங்காத பண்புடையவனாக இருக்க வேண்டும் என்பது! 

இந்த செங்கோன்மையைப் பற்றி பத்துக்குறள்களில் வள்ளுவர் கூறுகிறார்; 

கோல் என்பது அதிகாரம்; அது செம்மையான அதிகாரமாக செங்கோலாகவும் இருக்கலாம்; கொடுமையான அதிகாரமாக கொடுங்கோன்மையாகவும் இருக்கலாம். 

வள்ளுவர் முதல் குறளில் செங்கோன்மை என்பது என்ன என்று வரையறுக்கிறார்; 

ஓர்ந்துகண் ணோடாது இறைபுரிந்து யார்மாட்டும் தேர்ந்துசெய் வஃதே முறை. 

எது சரி எது தவறு என்பதை சரியாக ஆராய்ந்து, சம நிலையுடைய மனதுடன் (இறைபுரிந்து என்றால் இறைவன் எல்லா உயிர்களின் மேலும் சம பாவம் உடையவன்(; தான் செய்யும் காரியத்தை செய்பவன் செங்கோன்மை உடையவன்; அதிகாரத்தை அப்பியாசிக்கும் போது கூர்ந்து எது சரி? எது பிழை என்று ஆராயும் பண்பும், பின்னர் உணர்ச்சிகளுக்கு ஆட்படாமல் பக்கச்சார்பு இல்லாமல் சரியானதைச் செய்வது செங்கோன்மை. 

இரண்டாவது குறளில் அதிகாரம் உடையவனிடம் அவனை அண்டியவர்கள் அந்த அதிகாரத்தின் மூலம் எதை எதிர்பார்ப்பார்கள் என்றும் அதிகாரம் உடையவர்கள் அதை நிறைவேற்ற வேண்டும் என்பதும் வள்ளுவர் சொல்லுகிறார். 

வானோக்கி வாழும் உலகெல்லாம் மன்னவன்

கோல்நோக்கி வாழுங் குடி.

உலகம் மழை பொழிந்தால்தான் செழுமை உறுவது போல் அதிகாரம் உடைய மன்னவன் தனது அதிகாரத்தை மக்கள் இன்பமாக வாழ பிரயோகிக்க வேண்டும் என்று குடிகளெல்லாம் எதிர்பார்த்து காத்திருப்பர். 

ஒரு தேசத்தில் அறம் தவறாமல் இருந்தால்தான் அங்கு உயர்ந்த அறிவு உருவாகும். அது அதிகாரம் செம்மையாக இருந்தால் மாத்திரமே நடக்கும்! 

மக்களின் தேவைகளைப் புரிந்து அதிகாரத்தைப் பிரயோகிக்கும் மன்னனின் அடிச்சுவட்டையே மக்கள் பின்பற்றுவர். 

செங்கோன்மையோடு கோலோச்சும் மன்னவனின் இராச்சியத்தில் விளைச்சலும் வளமும் குன்றுவதில்லை; பொருள் வளத்தால் செழிக்கும். 

மன்னவனின் ஆயுதம் கையில் பகைவரை அழிக்கும் வேல் அல்ல! தன் மக்கள் மனதை வெல்லும் செங்கோல்! 

இறையாகிய செங்கோன்மையால் மக்களை அரசன் காத்தால் அரசனை மக்கள் காப்பர்

செங்கோலின் உச்சியில் இருக்கும் இடபம் இறைவனைத் தாங்கும் வாகனம்; இறைவனாகிய சிவபெருமானை சிரசில் தாங்கி அவன் ஆற்றல் உடலில் பரிணமிக்கும் இடபமாகிய புருவமத்தியில் சிவ ஒளி பெருகினால் அத்தகையவனுக்கு வள்ளுவர் கூறும் இறை புரியும் என்ற இறைவனைப் போல் சமபாவத்துடன் இருக்கும் வல்லமை வாய்க்கும்; அறத்துடன் ஆட்சி புரிவேன் என்பது செங்கோல் ஏற்கும் மன்னனது உறுதி மொழி! 

அத்தகைய உறுதி மொழியுடன் ஸ்ரீ விவேகானந்தரும், ஸ்ரீ அரவிந்தரும் கண்ட செங்கோன்மை நிறைந்த உலகத்திற்கு ஞானம் பரப்ப வல்ல பாரத தேசம் உருவாக சங்கல்பம் பூண்கிறாரா பாரதப் பிரதமர்?