அரசியல்

நாம் அரசியல் தலைவர்களை நக்கலடிக்கிறோம், நையாண்டி செய்கிறோம். ஆனால் ஆழ்ந்து சிந்தித்தால் அவர்கள் பெரும்பாலான மக்களின் குணங்களின் பிரதிபலிப்பே!

ஒரு கடத்தல் காரன் பாராளுமன்ற உறுப்பினராக தெரிவு செய்யப்பட்டால் அவனைத் தெரிவு செய்த பெரும்பாலான மக்கள் அவனது கடத்தல் திறனை உள்ளூர இரசிக்கிறார்கள், மதிக்கிறார்கள் என்று அர்த்தம்! 

ஊழல்வாதி பாராளுமன்ற உறுப்பினராகத் தெரிவு செய்யப்பட்டால் அவனைத் தெரிவு செய்த பெரும்பாலானவர்கள் ஊழலை இரசிக்கிறார்கள் என்று அர்த்தம்! 

இங்கு நடப்பது மக்கள் ஆட்சி! மக்கள் என்ன தரத்தில் இருக்கிறார்களோ அந்த தரத்திலேயே மக்களின் பிரதி நிதிகள் இருப்பார்கள்! 

மக்களின் அகப்பண்பிற்கு ஏற்ற தலைவர்களே மக்களிற்கு வாய்க்கிறார்கள். மாற்றம் வேண்டும் என்றால் நாம் மக்கள் மனம் மாறி, உயர்ந்த இலட்சியமுள்ள சமூகத்தை உருவாக்க வேண்டும். 

நல்ல விதையும் தீய மண்ணில் இட்டால் நோய் பிடித்த குறழ் தாவரம் வருவது போல் நல்ல எண்ணமுள்ளவன் இப்போதுள்ள அரசியலிற்குள் வந்து இது தான் இயல்பு ஏற்றுக்கொள்ள வேண்டும் என்று தீய அரசியல் பண்பினைத் தான் கடைப்பிடிக்க வேண்டும். இல்லாவிட்டால் நிர்வாண தேசத்தில் கோவணாண்டி கோமாளி என்ற நிலை உருவாகிவிடும் என்பதை அண்மையில் ஒரு அரசியல்வாதி மிகப்பெரிய ஊழல்வாதிகளுடன் நின்று எடுத்துக்கொண்ட படத்திற்கு தந்த விளக்கத்தைப் பார்க்கும் போது தெரிந்து கொள்ளலாம். 

நாம் ஊழல்வாதிகளை, கடத்தல் காரர்களை உள்ளே ஹீரோவாக இரசிக்கும் விழுமியமுடைய, யதார்த்தமாக ஏற்றுக்கொள்கிற மனப்பக்குவத்தில் தான் இருக்கிறோம் என்பதைப் புரியாமல் நக்கல் அடிப்பதும், கேலி பேசுவதும் எந்த மாற்றத்தையும் கொண்டு வராது. 

மாற்றம் வரவேண்டியது மக்களின் மனதில்! அது நடந்தால் அந்தப் பண்பிற்குரிய தலைவர்கள் உருவாகுவார்கள். 

அறச்சிந்தனையுடைய எதிர்காலச் சந்ததியை உருவாக்குவதற்கு அதிகமான உழைப்பைச் செலுத்த வேண்டும்.