ரிஷி சிந்தனை - 01

மனித சமுதாயம் நல்ல முறையில் மாற்றம் அடைய வேண்டும் என்பதற்காக பண்டைய ரிஷிகளின் ஞானத்தை எளிமைப்படுத்தி வழங்கியவரே பண்டிட் ராம்சர்மா ஆச்சார்யா.  அவரது சிந்தனைகளை வாசகர்களின் சிந்தனைக்கு ஒவ்வொரு வாரமும் வழங்க குருவருள் கூடியுள்ளது.

மனிதன் செய்யும் செயல்களையும், ஒட்டுமொத்த சமூகமாக இயங்கும் நிலையையும் உற்று நோக்கினால், அவை அந்த மனிதர்களிலும் சமூகத்தினதும் மனங்களில் ஏற்றுக்கொள்ளப்பட்ட கொள்கைகளின் வெளிப்பாடாகவே இருக்கும்.

நம்பிக்கைகளும் ஏற்றுக்கொள்ளப்பட்ட கருத்துக்களும் அவர்களின் மனதில் அல்லது ஆழ்மனத்தில் உத்வேகங்களாக உருப்பெறுகின்றன. உருப்பெற்ற அந்த உத்வேகம், பின்னர் விருப்பமாக மாறி செயலுக்கு வருகிறது.

ஒரு மனிதன் தான் காணும் அல்லது செய்யும் செயல்கள் யாவற்றையும்,  தனது மனத்தில் பதிப்பிக்கப்பட்ட ஆழ்மன நம்பிக்கைகள் மூலமாகவே காண்கிறான். பலவித வாழ்க்கை முறைகளையும், பலவித செயல்களையும் உடைய வித்தியாசமான மனிதர்களை நாம் சமூகத்தில் காண்கிறோம்.

இவை அவர்களின் ஆழ்மன உணர்வில் ஆழமாக பதிப்பிக்கப்பட்ட நம்பிக்கைகளின் விளைவுகளே! ஒருவனின் நல்லொழுக்கங்களும் அவனது மதிப்பீடுகளும் சமூகத்தில் அவனது செயல்களை கட்டுப்படுத்துகின்றன.

தத்துவவாதி செயிண்ட் எமர் சன் அவர்கள், ”எதிர்காலத்தில் உலகில் போர்கள் இல்லாமல் போய்விடும்” எனக்குறிப்பிடுகிறார். ஏனெனில் போர்களுக்கான காரணம் மக்களின் மனதில் ஆழமாக விதைக்கப்பட்டிருக்கும் எதிரி, எதிர்ப்புணர்ச்சியுடன் கூடிய கொந்தளிப்பு, சண்டை, வெற்றி என்ற ஆழ்மன எண்ணங்களுடன் தொடர்பு பட்டுள்ளது.

இவை தற்போதைய உலக சமாதானம், உலக மதம், நாம் அனைவரும் உலகின் பிரஜைகள் என்ற கொள்கைகள் மூலம் மீள் நிரப்பப்படும்போது போர் புரியும் எண்ணம் அகற்றப்படும்.

உலகமே ஒரு குடும்பமாக எண்ணும் எண்ணம் வளரும். இந்த எண்ணம் வளரும்போது மக்கள் அனைவரும் சுய நலமற்று மனித குலத்திற்கு சேவை செய்யும் நிலைக்கு உயர்வார்கள். எனவே எதிரிகள் இல்லாமல் போய் அனைவரும் மற்றவர்களுக்கு உதவும் மனநிலைக்கு மாறுவார்கள். 

இத்தகைய மாற்றம் மனிதகுலத்தில் நிச்சயம் நடைபெறக்கூடிய ஒன்றே!. உலகில் உள்ள புத்திஜீவிகள் அவர்களது நேர்மையான முயற்சியால் உலகில் மாற்றத்தினை ஏற்படுத்த முடியும். ஒரு மனிதன் நம்பும் தத்துவமும், வாழ்வின் மீதான பெறுமதியின் மாற்றமும் அந்த மனிதனின் இயல்பை மாற்றும். இப்படி மனிதனின் இயல்பு மாற்றம் பெற்றால் உலகின் சண்டைகள், சச்சரவுகள் முடிவுக்கு வரும்.

இந்த அனுமானம் வெறும் கற்பனையல்ல! ஒரு ஆழமான உண்மை! எதிர்காலத்தில் ஆழமான எண்ணங்களே புதிய உலகை உருவாக்கப்போகின்றன.

எண்ணப்புரட்சியின் புயல் பலமாக வீசும். இந்த எண்ணப்புரட்சி மூலம், சமூகத்தில் காணப்படும் தாழ்மை உணர்ச்சிகள், பிறழ்ச்சிகள் காற்றில் வீசியெறியப்படும் வைக்கோல் போல் எறியப்படும்.

புதிய எண்ணங்கள் புதிய சமுதாயத்தையும் புதிய மனிதர்களையும் கட்டி எழுப்பும். அவை புதிய சம்பிரதாயங்களை உருவாக்கி புதிய செயல்களை வெளிப்படுத்தும்.

அது எவ்வாறு நடைபெறும் என்பதை அடுத்த வாரம் காண்போம்!

(தொடரும்….)