கிருஷ்ணா, ஸ்ரீ, செந்தில் சந்திப்பு

வருகைக்கு நன்றி கிருஷ்ணா, ஸ்ரீ, செந்தில்! 

அன்புற்று அமர்ந்த வழக்கென்ப வையகத்து

இன்புற்றார் எய்தும் சிறப்பு. 

இவ்வுலகத்திலே இன்பம் அடைந்தவர் அடையும் சிறப்பு, அவர் அன்புடையவராகப் பொருந்தி வாழ்ந்த வாழ்க்கையின் பயனே என்பர்

அவர்கள் வாழ்க்கையில் உயர நான் வழி காட்டியிருக்கிறேனாம்! ஒவ்வொரு வருடமும் தவறாமல் கடல் கடந்து விமானம் ஏறி என்னைப் பார்த்துச் செல்வது அதற்குரிய மரியதையாம்! 

இது நிபந்தனையற்ற அன்பினைத் தவிர வேறு ஒன்றும் இல்லை! 

நானோ தனிமையில் கற்றலையும், கற்றலால் வரும் சுகத்தையும் அனுபவிக்கும் போகி! எல்லோரையும் வரவேற்று உபசரிக்கும் நேரமில்லாதவன். 

எனது முதல் குரு நாதர் " தரவேண்டியது எல்லாம் விதைகளாக சித்தத்தில் பதித்தாயிற்று, மரமாகும் போது பறவைகள் தேடி வரும் என்றார். எனது ஸ்ரீ வித்யா குரு நாதர் உன்னிடம் இருப்பதை நிபந்தனையற்று பகிர்ந்து கொள் என்றார்! என்னிடம் பணம் இல்லை! அறிவும் தெளிவும் இருக்கிறது. அதை எழுத்தாக பகிர்ந்து கொண்டேன்! பலர் தெளிவிற்கு நாடி வந்தனர்!.

என்னிடம் ஏதும் சிறப்பு இருப்பதாக எனக்கு தெரியவில்லை! எவர் பிரச்சனை என்று வந்தாலும் அதை தெளிவுப்படுத்தி, அவர்களாகவே தீர்த்துக்கொள்ளும் படி வழிகாட்டும் ஆற்றலை அன்னை தந்திருக்கிறாள். தளராமல் ஒரு நாளுக்கு 18 மணி நேரம் எந்த எதிர்பார்ப்பும் இல்லாமல் உழைக்கும் ஆற்றலைத் தந்திருக்கிறாள். 

எனது கம்பனி வாழ்க்கையில் இருந்து நான் விலகும் போது எனது மேற்பார்வையாளர் இறுதி விருந்து போசனத்தில் எனது சிறப்பியல்புகளில் ஒன்று என "சுமன் தெளிவை வேண்டுபவர், அவருக்கு நிறுவனத்தில் தலைமைத் தெளிவு அதிகாரி என்ற ஒரு பதவியை உருவாக்கலாம் என்றார். 

நுவரெலியா சென்றோம்; நூற்றெட்டு பாண லிங்கங்களுடன் நுவரெலியா ஸ்ரீ காயத்ரி பீடத்தில் கோயில் உருவாகிறது; அதனை தலைமை அறங்காவலர் சந்திரமோகன் அண்ணாவுடன் கோயில்களை எப்படி சமூகத்துடன் இணைக்க வேண்டும்; அனாவசிய சடங்குகளுக்களை உருவாக்கி மக்களை குழப்பாமல் குரு நாதர் காட்டிய வழியில் எளிமையாக எவர் வந்தாலும் அவர்களுக்குரிய இடமாக கோயில் அவர்களுக்குரியது என்ற உணர்வினைத் தரவேண்டும் என்பது பற்றி உரையாடினோம். எவர் வந்தாலும் உணவருந்தாமல் செல்லக்கூடாது என்பது சாமியின் விருந்தோம்பல் பண்பு! அதை செவ்வனே மோகன் அண்ணாவும் செய்கிறார்.