தலைப்பு இல்லை

வைரசு நோயிற்கு ஏன் ஊரடங்குச் சட்டம்?

காரண காரியம் புரியாமல் மக்களின் நடத்தையைக் கட்டுப்படுத்துவது மிகுந்த சிரமமானது. 

ஆகவே தெளிவிற்கு இந்தப்பதிவு;

வைரசை கட்டுப்படுத்துகிறோம் என்பது ஒரு வேடிக்கையான நகைச்சுவை! வைரசு ஒரு மாயக்கள்வன், எப்படி உடலுக்குள் வருகிறான், வந்துவிட்டானா இல்லையா என்று தெரியாது! வைரசு உடலிற்குள் வந்து விட்டால் எமது கலங்கள் எமது உடலில் பாதுகாப்பு அமைச்சான (defense ministry) நிர்ப்பீடனத் தொகுதிக்கு (immune system) செய்தி அனுப்பும். செய்தி பறந்ததும் நிர்ப்பீடனத்தொகுதி தனது படைகளைச் சரி செய்து சண்டைக்குத் தயாராக வேண்டும். 

இங்குதான் வைரசுடனான போரானது உடலின் பாதுகாப்பு அமைச்சான நிர்ப்பீடனத்தொகுதிக்குச் சிக்கலானது. இந்தச் சிக்கல் இரண்டு காரணிகளைக் கொண்டுள்ளது. 

1) உடல் வைரசுடனான சண்டைக்காக தனது படையினை உருவாக்கும் வேகத்தினை விட வைரசு தன்னை பெருக்கிக் கொள்ளும் வேகம் அதிகமானது. நீ ஒரு தடவை பெருகினா நான் நூறு தடவை பெருகுவேன் என்று பஞ்ச் சொல்லிக்கொண்டு வைரசு உடலிற்குள் பெருகிக் கொள்ளும்.

2) மனிதன் ஒரு அறிவு (கெட்ட) விலங்கு; வைரசு புகுந்து விட்டது என்று உடல் அறிவித்து சோர்வை, காய்ச்சலை ஏற்படுத்தி நான் போருக்குத் தயார், நீ வேறு வேலைகள் எதுவும் செய்யாமல் ஓய்வெடுத்து சக்தியை வீணாக்காமல் எனது போருக்கு ஒத்துழைப்புச் செய் என்று செய்தி அனுப்பினாலும் வேலை, பணம், கேளிக்கை என்று எவற்றாவதன் பின்னால் ஓடி நிர்ப்பீடனத்தொகுதியின் வேலையைக் குழப்பி அழிவைத்தான் தேடுவான். 

இதனால் தான் வைரசு நோய்களுக்கு ஓய்வு தான் முதல் மருந்து, எமது உடல் நிர்பீடன சக்திக்கு உதவும் வகையில் நாம் எமது உடலின் சக்தி விரயத்தைத் தடுக்க வேண்டும். 

உடலிற்குள் வைரசு புகுந்தவுடன் விளையாட்டு ஆரம்பமாகும்! வைரசு வேகமாக பல்கிப் பெருகும், உடல் அதை எதிர்த்துப் போராடத் தேவையான முழுமையான நிர்ப்பீடன சக்தியைப் பெற குறைந்தது மூன்று நாட்கள் தேவை! இது பரிபூரண ஆரோக்கியமானவர்களுக்கு!

குடி, கும்மாளம், புகை என்று உடலைக் கெடுத்து வைத்திருப்பவர்களுக்கும் சதா மன அழுத்ததில் இருப்பவர்களுக்கு, வேறு நாட்பட்ட நோய் இருப்பவர்களுக்கு இதைவிட அதிக நாள் எடுக்கும். 

முதல் தடவை புதிய வைரசினை எதிர்கொள்ள, நிர்ப்பீடனத்தை உருவாக்க உடல் மிகுந்த சிரமம் அடையும். இந்தக்கட்டத்தைத் தாண்டி விட்டால் பிறகு எப்போது உள்ளே நுழைய முயன்றாலும் தகுந்த தாக்குதலைக் கொடுத்து உடல் வெல்லும்! 

ஆகவே மக்களே வீட்டிற்குள் இருக்கச் சொல்லிக் கட்டாயப்படுத்துகிறார்கள் என்றவுடன் மற்றவர்களுக்குப் பரவி விடும் என்று எதோ ஓசியில் பொதுச் சேவை செய்கிறோம் என்ற நினைப்பை விட்டுவிட்டு, இந்த மூன்று நாள் ஓய்வு நீங்கள் வைரசு தொற்று இருந்தாலும் உங்கள் உடலை வைரசுடனான போரிற்கு தயார்படுத்தும் காரியத்திற்கான ஓய்வாக, நல்ல மகிழ்ச்சி தரும் உணவையும், குடும்பத்துடன் ஆரோக்கியத்தைத் தரும் கேளிக்கையையும் கொள்ளுங்கள்!

உடல் ஆரோக்கியமாகவும் ஓய்வாகவும் இருந்தால் எந்த நோய் வந்தாலும் உடலில் பாதுகாப்பு அமைச்சான நிர்ப்பீடனத் தொகுதி (Immune system) பார்த்துக்கொள்ளும்! நீங்கள் செய்யவேண்டியது உடலையும் மனதையும் ஓய்வாக வைத்துக்கொள்ளவேண்டியதுதான்

ஆகவே ஊரடங்குச் சட்டம் உங்களை வைரசுடனான போரிற்காக தயார்படுத்தலுக்கானது! அதன் அடிப்படை உடலிற்கும், மனதிற்குமான ஓய்வும், உங்கள் நிர்ப்பீடனத் தொகுதிக்கு உதவி நிர்ப்பீடன சக்தியை அதிகரித்தலும்!