உண்மை ஞானத் திறவுகோல் - உண்மையான ஞானம் பெற வேடங்கள் அவசியமா?

உண்மையான ஞானம் பெற வேடங்கள் அவசியமா? என்பது பற்றி விபரிக்கிறது. 

சமய நெறியின் மயக்கத்திலே மயங்கி கிடக்கும் மக்களில் எப்படியோ தவறான பல நம்பிக்கைகள் வேரூன்றியிருக்கின்றன. அவைகளில் ஒன்றை மட்டும் ஆராய்வோம். "இதோ முருகன், இதோ கிருஷ்ணன் என்று கடவுளை பகுத்து கூறுவது போல "இவர் மகான், இவர் யோகி, இவர் சாது, அவர் சந்நியாசி" என பகுத்தறியும் வலியினை கண்டுபிடித்திருக்கிறார்கள் மதவாதிகள். உண்மையை உணரும் வரை நானும் இப்படித்தான் பெரியோர்களை கண்டு வந்தேன். 

சாது, சந்நியாசி, பக்தன், யோகி என்பவர்கள் உடையாலோ, உண்ணல் முதலிய வாழ்க்கை முறைகளாலோ, மற்றவர்களை விட மாறுபட்டு இருப்பவர்கள் அல்ல. பாரத நாட்டில் வாழ்ந்த எந்த சித்தரோ, யோகிகளோ மக்களை விட வேறு பட்டு இருக்கவில்லை. சமய நெறி என்ற மதங்கள் தோன்றுவதற்கு முன்னர் இவ்வுலகில் வாழ்ந்த பக்தர்களும், ஆன்ம முன்னேற்றமடைந்தவர்களும் சாதாரண மக்களை விட வேற்றுமை அற்றுத்தான் வாழ்ந்தார்கள். சமய நெறி ஒரு கட்டமைப்பாக வந்தபின்னர்தான் தமக்குரிய அடையாளங்களை ஏற்படுத்திக்கொண்டனர். அதைதொடர்ந்து எண்ணற்ற வேஷங்கள் வெளியாயின. 

பக்தி, யோகம், தவம் எனும் சாதனங்கள் உடலில் உள்ளுறையும் ஆன்மாவை கவர்ந்திழுக்கும் அறியாமை அழுக்கை அகற்றவும்  அணுவுக்கு அணுவான ஆண்டவனின் அருளைப்பெறவும்தான் செய்யப்படுகின்றன. அறிவை அறியாமையில் இருத்தி செயற்படுவது உடல், உடல் அநித்தியமானது, சாதனைகள் நித்தியத்தினை நாடி செய்யப்படுபவை. யோகம் முதலான சாதனைகள் உடலால் செய்யப்படுபவை அல்ல. அவை உள்ளத்தால் செய்யப்படுபவை. உடலை மறந்து உணர்வினை உள்முகப்படுத்தி செய்யப்படுபவை. உடலை மறந்து செய்யும் ஒரு சாதனை செய்யும் ஒரு சாதகனின் நினைவு உடலை அலங்காரப்படுத்துவதில் எப்படி ஈடுபட முடியும்?

இதற்கு இன்றைய நிலையில்  யோகம் பழக்குகின்றேன் என்று கூறுபவர்களும் மதவாதிகள் போன்றே செயற்படுகின்றனர். மேலும் ஆசனங்களை மட்டும் தெரிந்து கொண்டு தம்மை யோகி என அழைத்துக் கொள்பவர் பலர். 

உடலில் சாதுத்தன்மை இருக்க முடியாது. உள்ளத்தில் தான் சாதுதன்மை இருக்க முடியும். உடலில் பக்தி வராது உள்ளத்தில் தான் பக்தி வர வேண்டும். இவற்றுக்கெல்லாம் ஆதாரமாக உடல் இருப்பதால் உடலினை ஆரோக்கியமாக வைத்திருப்பதுதான் யோகத்தின் ஒரு நோக்கமே அன்றி இதனால் உள்ளத்தில் பற்றி உள்ள மாயை இம்மியளவும் அகன்று விடாது. 

ஒருவன் விலை உயர்ந்த ஆடைகளை அணிந்து பத்து விரல்களிலும் பெரிய பொன் மோதிரங்களை அணிந்து எல்லோர் முன்னிலையிலும் திரிகின்றான் என்றால் என்ன அர்த்தம்? தனது செல்வா செருக்கை எல்லோருக்கும் விளம்பரப்படுத்துகிறான் என்பது தானே! காவலனின் உடை அவன் புற உலகில் செய்ய வேண்டிய தொழிலைக் காட்டுகிறது. அதுபோல் மற்றைய தொழில்களும் அதற்குரிய உடையினை கொண்டு அறியப்படுகிறது. இதுபோல் சாதுக்களும் சந்நியாசிகளும் விளம்பரப்படுத்திக் கொள்ள வேண்டுமா? உடையினைக்கொண்டு ஒருவன் வழக்கறி ஞர் என்று கண்டு வழக்கை ஒப்படைப்பது போல் காவியுடைகளையும், பெரிய ஆசிரமமும் வைத்திருக்கும் பெரிய சாமியார்களை கண்டதும் ஆன்ம ரகசியங்களை கேட்கலாமா? அவர்கள் எல்லோரும் இறையின்பத்தினை அனுபவித்தவர்களா? இன்று இப்படி ஆடைகளையும் வேடங்களையும் கண்டு சென்று துன்பம் அனுபவித்தவர்கள் பலர் என கேள்விப்பட்தில்லையா? 

ஆகவே அன்பர்களே பக்தி, யோகம் போன்ற சாதனைகளுக்கும் உடல் வேஷங்களுக்கும் ஒரு பொருத்தமும் இல்லை என்பதை உணருங்கள். வெளி வேடத்தை கொண்டும்  ஆன்ம முன்னேற்றம் உடையவனை கண்டு பிடிக்க முயன்றால் ஏமாந்துதான் போவீர்கள். பக்தி யோகம் என்பவை உணர்வால் சய்யப்படுபவை. அதற்கு உடைகளாலோ வெறு எதனாலோ வேடங்கள் மாறுதல்கள் செய்யத்தேவையில்லை. இப்படியான மக்களை ஏமாற்றும் பலர் உள்ளார்கள். 

உள்ளத்துறவு வாழ்க்கை 

அக்காலத்தில் வாந்த மகரிஷிகள் மனைவி மக்களுடன் தூய வெண்ணிற ஆடையணிந்து மக்கள் மத்தியில் மக்களோடு மக்களாகவே வந்தார்கள். இந்திரனையே சபிக்கும் ஆற்றல் இருந்தும் தம்மை வேடத்தாலோ, நடிப்பலோ உயர்ந்தவர்களாக காட்டிக்கொள்ளவில்லை உள்ளத்தில் துறவு பூண்டு வந்தார்கள். உடையை மாற்றி உள்ளத்தில் இன்பத்துடன் வாழவில்லை. இப்படியான உயர்ந்த நிலையடைந்த சாதகர்கள் இன்றும் உலகின் பல பாகங்களிலும் தம்மை வேஷங்களால் உயர்ந்தவர்களாக காட்டிக்கொள்ளாமல் மக்கள் மத்தியில் தாமரை இலை மேல் தண்ணீர் போல் வாழ்ந்து வரத்தான் செய்கிறார்கள். இவர்களை குப்த யோகிகள் என்று சொல்லலாம்.  

ஆன்ம  தாகம் கொண்டவர்களே, அடைய வெண்டிய பொருள் என்று ஒன்று உண்டு, அது ஆண்டவனின் திருவடி! அதை அடையவேண்டும் என்ற உண்மை ஆர்வம் உங்கள் உள்ளத்தில் உண்டானால் அதை அடைய வழி காட்டும். எதோ ஒரு வகையில் அத்தகைய குப்த யோகிகளது தொடர்பு உங்களுக்கு நிச்சயம் கிட்டும்!  தட்டுங்கள்! ஞானக்கதவு திறக்கப்படும், கேளுங்கள் உண்மை ஞான திறவுகோல் உங்களுக்கு கொடுக்கப்படும்!

-- குருதேவர் ஸ்ரீ கண்ணைய யோகி அருளியபடி ---