தலைப்பு இல்லை

இயற்கை விவசாயத்திலும், சூழலியலிலும் மூழ்கிப் போன என்னை சித்தர் பாடல் பக்கமாக வம்பிழுப்பதற்காக    நண்பர் ரகு (Raguram Annur) வாட்ஸப்பில் அனுப்பியிருந்தார்! அனுப்பப்பட்ட பாடல் வழமையாக முக நூலிலும், வாட்ஸப்பிலும் பரப்பப்படும் அரை குறைச் செய்தி! அந்தப் படம் (மஞ்சள் நிற பாடல் உள்ள படம்) கீழே இணைக்கப்பட்டுள்ளது. அதில் முதல் வரி விடுபட்டுள்ளது. 

சரியான முழுமையான பாடல் வருமாறு: 

வாதுக்குறி வைத்தியரே சொல்லக்கேளீர் 

வாகாக்கண் மூன்று தலைகள் நான்கு

நீதமுடன் முகங்களைந்து கைகளாறு

நிலை சரீரங்களெட்டு கால்கள் பத்து

வீதமிதன் பயனறிந்தார் வியாதி தீர்ப்பார்

விதமறியார் மானிடரைப் பழியே செய்வார்

செதமாஞ்ச் செய்மருந்து பலித்திடாது

செத்தபின்பு தீ நரகிற் சேருவாரே

அகத்திய முனிவர் அருளிச் செய்த வைத்திய சாரம் என்ற நூலில், ஐந்தாவது பாடல் இது!

இதன் பொருள் அறிந்து வைத்தியம் செய்பவரே உண்மை வைத்தியர் என்கிறார் அகத்தியர் பெருமான்! 

இதை ஒரு விடுகதை என்று நினைத்து முக நூலில் பலர் பதிவிடுகிறார்கள். நூலிலுள்ள ஒரு பாடலை எங்காவது பொறுக்கி விட்டு மனம் போன போக்கில் பொருள் காண்பதல்ல சித்தர் பாடல்கள்! நூலை முழுமையாகப் படிக்க வேண்டும். ஒவ்வொரு வரியாக ஆழமாக சிந்தித்து குருமுகமாய் அறிய வேண்டும். 

மேற்கூறிய பாடலிற்குரிய பதிலை அதற்கு அடுத்த ஆறாவது பாடலில் கூறிவிடுகிறார்! அதைப் படிக்காமல் இதை அகத்தியர் ஏதோ விடுகதை போடுகிறார் என்று எண்ணி விடை காண அலையத் தேவையில்லை. 

மருந்து சுத்தி குணம் நிகண்டு மூன்றாம்

வாத பித்தசிலேட்டும தொந்தந்தலைகள் நான் காம்

அருந்தும் அறுசுவையறிதல் கைகளாறாம்

அஷ்டவிதக்குறியறிதல் சரீரமெட்டாம்

இருந்த தச நாடி தசவாயுவிரண்டும் 

இதமாகப் பார்த்திடில் கால்கள் பத்தாம்

பொருந்தியதோர் பிணட நிலை முகங்களைந்தாம் 

பொதிகைமலை அகஸ்தியனார் புகன்றவாறே 

ஆக கேள்வியும் நானே! பதிலும் நானே!