குறைகளைச் சுட்டிக் காட்ட வேண்டும்! அதேவேளை அவர்களுடைய Ego வினை கிளப்பிவிட்டு கோபத்தைத் தூண்டக்கூடாது. காயப்படுத்தி தாழ்வு மனப்பான்மை உண்டாக்கக்கூடாது! ஆர்வத்துடன் செயல் புரியும் உத்வேகத்தை உருவாக்க வேண்டும்; அதற்கு நிதானமும், சிந்தனையைத் தூண்டும் வகையிலும் உரையாட வேண்டும்! எனது மாணவர் ஒருவர் ஒரு முறை கூறினார் “ஐயா உங்களிடம் கேள்வியைக் கொண்டுவந்தால் பதிலை நாம் தேடி உணரும் வகையில் அழகாக எமக்குள்ளே திருப்பி விடுவீர்கள்” என்று!
ஆம் கற்பித்தலின் முதல் நியதி “எவருக்கும் எதையும் கற்பிக்க முடியாது, அவர்கள் ஏற்பு நிலையில் இல்லாமல்” என்பதே!
ஒரு மாணவர் பல வருடங்களுக்கு நொந்து நொடிந்து வந்தபோது ஆலோசனை கூறி உளத்தை மீளமைத்து வாழ்க்கைப் போராட்டத்தில் சண்டை பிடிக்க வீரனாக்கினால் சிலமாதங்களில் தனது பழைய பழக்க வழங்கள், சிந்தனை முறைகளுக்குள் போய் ஒளிந்து கொண்டு அண்ணா பயமாக இருக்கிறது என்று வெருண்டு கொண்டு வருவார்!
இப்போது அவருக்கு நிதிப்பிரச்சனையாம்! அதற்கு அனுப்பிய வழிகாட்டல் இங்கும் சிலருக்கு பொருந்தும்! உபயோகமாக இருக்கலாம்.
*******************************************
அன்பின் மாணவரே,
உங்களுடைய நிதிப்பிரச்சனைக்கு உங்களுடைய பேராசைகள், நிதி ஒழுக்கமே காரணம்.
இங்கு பேராசை என்பது உயர்ந்ததை அடையவேண்டும் என்ற ஆசை இருக்கக் கூடாது என்பதல்ல! உயர்ந்த விஷயத்தை குறுக்கு வழியில் அதற்குரிய உழைப்பை, விலையைக் கொடுக்காமல் ஏமாற்றி இலாபம் பெற நினைக்கும் எண்ணம்!
நீங்கள் உழைக்கும் பணத்தைக் கணக்குச் செய்தால் சாதாரணமாக ஒரு பட்டதாரி உழைப்பதை விட அதிகமாக உழைக்கிறீர்கள்.
நீங்கள் செலவு செய்வதை ஆராய்ந்து பாருங்கள்; அவற்றில் போலிப்பகட்டு இருப்பின் திருத்திக்கொள்ளுங்கள்.
தர்ம காரியங்களுக்கு பணம் செலவழிக்கும் போது உங்களிடம் பணம் இல்லை என்று மனதில் சூழ் நிலையை உருவாக்கி அகத்தில் தரித்திரம் உருவாக்குவது பின்னர் எதிர்வினையாக பேராசைப்பட்டு ஏமாறுவது என்ற நிலை உங்களில் இருக்கிறதா என்பதை கவனியுங்கள்.
நான் எல்லோராலும் விரும்பப்பட வேண்டும், மதிக்கப்பட வேண்டும் என்ற உளத்தாழ்வு நிலை இருந்தால் அதை ஈடுகட்ட எனது நிதி வலிமையை விட பகட்டாக மற்றவர்களுக்கு உதவுகிறேன் என்று சென்று மாட்டிக்கொள்கிறீர்களா என்பதை கவனியுங்கள்.
தினசரி உங்கள் தொழிலில் உழைப்பைச் செலுத்தாமல் பணம் கிடைத்தவுடன் ஓய்வாக இருப்பது, உல்லாச மன நிலை வருவது, பிறகு பணம் முடிந்தவுடன் பயம், கவலை கொள்வது போன்ற தவறுகளைச் செய்கிறீர்களா என்பதைக் கவனியுங்கள்!
இப்படி தகுந்த ஒழுக்கத்தினைப் உங்களில் உருவாக்காமல் உங்களைச் சுற்றி உலகமே சூழ்ச்சியால் இயங்குவது போல கற்பனைப் பயத்தை உருவாக்கி உங்களை நீங்களே ஏமாற்றிக்கொள்ளாதீர்கள்.
மீண்டும் மீண்டும் இதைப் படித்து உங்களில் இந்த அகக்காரணி இருக்கிறதா என்பதை கவனித்து திருத்திக்கொள்ளுங்கள்!
திருத்த வேண்டும் என்றால் விழிப்புணர்வுடன் சுய பச்சாதாபம் காட்டாமல் உங்கள் எண்ணங்களை நீங்கள் கவனிக்க வேண்டும்!
No comments:
Post a Comment
எமது பதிவுகளை FaceBook இல் பகிர விரும்புவவர்கள் தகுந்த இணைப்புடன் பகிரவும். தமது தனிப்பட்ட வலைத்தளங்களில் பகிர விரும்புவபர்கள் தனிப்பட்ட மின்னஞ்சல் மூலம் அனுமதி பெற்று பகிரவும். எழுந்தமானமாக பிரதி செய்து பகிர்வது முறையான செய்கையாக கருதப்படமாட்டாது.